Sambært kanningini ‘Ungfólk 2012’, sum umfataði 540 føroysk ung (276 gentur og 264 dreingir) fødd í 1996 (fimm prosent vóru tó eitt ár eldri ella yngri), hevur ítrótturin ein serligan leiklut í ungdómslívinum hjá teimum flestu. Men hvat vita vit í grundini um tey ungu í Føroyum? Hvussu vilja tey sjálv lýsa tilveruna og heilsuna? Og hvat kunnu vit brúka kanningarúrslitini til? Latið okkum hyggja eitt sindur nærri at nøkrum av úrslitunum úr ‘Ungfólk 2012’ (sum er eitt slóðbrótandi føroyskt-íslendskt granskingarsamstarv).

Fýra av fimm føroyskum ungdómum (níggjundafloksnæmingar skúlaárið 2011-12) siga seg hava góða (‘sera góða’ ella ‘góða’) likamliga heilsu, meðan einans fimm prosent siga seg hava ringa heilsu. Spurd um sína sálarligu (andaligu) heilsu, er svarmynstrið hitt sama: 80 prosent av teimum ungu lýsa heilsuna at vera ‘góða’ ella ‘sera góða’, meðan eitt lítil bólkur – seks prosent – tíverri hevur sálarligar trupulleikar, sum elva til ‘ringa’ heilsu.

Tá ung, av persónligum ávum, leita sær hjálp og stuðul frá vaksnum í nærumhvørvinum, so er tað lutfalsliga sjáldan, at tey venda seg til ítróttarvenjarar ella onnur úr ítróttarumhvørvinum. Hjá nøkrum kemst hetta natúrliga av, at tey ikki eru partur av nøkrum (skipaðum) ítróttarfelagi. Onnur, kann væl hugsast, kenna ikki nóg væl venjararnar til at brúka teir sum stuðul, tá ymisk persónlig viðurskifti níva. Meira enn fýra útav fimm ungdómum – 82 prosent – siga seg ongantíð hava leitað sær hjálp frá ítróttarvenjara seinastu 12 mánaðirnar. Einans 11 prosent siga seg hava gjørt tað meira enn eina ferð seinastu 12 mánaðirnar.

Tá vit nú tosa um heilsuna hjá ungdóminum, so kann tað vera forvitnisligt at knýta omanfyrinevndu úrslit til ein spurning úr kanningini, sum snýr seg um svøvn: ‘Hvussu nógvar tímar svevur tú vanliga um náttina?’ Tey flestu ungu hava, sambært kanningini, eina sunna ‘sovirútmu’. Tey flestu – 71 prosent – sova sjey-átta tímar í miðal hvørja nátt, men 13 prosent av teimum ungu siga seg sova í minsta lagi níggju tímar. Hvussu nógv ung, sum fáa sær ein blund seinnapartin – eftir skúlatíð – vita vit ikki.

Tosa vit um heilsu, so mugu vit eisini tosa um likamsrørslu. Og tað førir okkum beinleiðis til spurningin um ítrótt: ‘íðkar tú ítrótt ella likamsrøkt?’ Tað gera tey flestu, gamaní, men sera ymist er, hvat hin einstaki ger av ítrótti ella aðrari likamsvenjing. Ein fjóðringur sigur seg næstan ongantíð íðka ítrótt. Ein fimtingur sigur seg íðka ítrótt eina til tvær ferðir um vikuna. Ein annar fimtingur sigur seg íðka ítrótt ella likamsrøkt fýra til seks ferðir um vikuna, meðan tey ídnastu í hópinum – tey, sum hvønn einasta dag venja – telja næstan 17 prosent. Tá hesi úrslitini verða greinað saman við øðrum úrslitum úr somu spurnakanning, so kemur fram, at ein lutfalsliga stórur partur av ‘kroppsvenjingini’ ikki er knýttur at formligum ítróttarfelagi.

Tá spurningurin snýr seg um ítrótt í ítróttarfelagi (kapping ella venjing), tvs. einans um skipaða ítróttarvirksemið í landinum, so er úrslitið heilt øðrvísi. Heili 42 prosent siga seg næstan ongantíð taka lut í hesum. Og 17 prosent av teimum spurdu svara at tey ganga til ítrótt eina til tvær ferðir um vikuna. Ein fimtingur av teimu sekstanáragomlu íðkar ítrótt í ítróttarfelagi fýra til seks ferðir um vikuna, meðan ‘einans’ 11 prosent dagliga ganga til ítrótt. Síðstnevnda úrslit kann ikki sigast at vera heilt óvæntað, tí innan flestallar ítróttargreinir verður –av heilsuávum – mælt til at hava í minsta lagi ein ella tveir ‘frídagar’ uttan venjing um vikuna.

Hvat gert tú fyri at halda teg í form?
Tíðin er sera kostbar beint nú hjá nær, men eg royni at ganga túrar, helst min 5 km, ætli mær at koma orduliga í gond við at renna aftur.

Ert tú limur í ítróttarfelag?
Eg havi roynt at stuðla ítróttarfeløgum, men eri ikki tilknýtt nøkrum felagi júst nú

Íðkaði tú ítrótt sum barn?
Sum barn sparkaði eg fótbólt við Royn. Eg spældi við gentum 14-17. Eg havi eisini íðkað fimleik við Havnar Fimleikafelag

Hvønn týdning hevur ítróttur og rørsla fyri teg og samfelagið?
Ítróttur og rørsla hevur sera stóran týðning fyri meg. Vit fáa tað betur bæði psykist og fysiskt. Hugsa vit samfelagsligt so burdu øll fólk rørt seg meira. Tað hevði minkað nógv um sjúkur hjá fólkið og tíðskil spart samfelagnum, serliga innan heilsuverkið, nógvar viðgerðir.

Smápartafelagið Ítróttavedding hevur júst latið sínum eigarum 10,5 milliónir krónur í veddingarpengum, sum koma føroyskum barna- og ungdómsarbeiði til góðar

Á hvørjum ári er tað ein munagóður pengaposi, ið verður lutaður út, tí føroyingar eru við í skipanini við veddingarpengum umvegis Danske Spil, og er tað smápartafelagið Ítróttavedding, ið umsitur hesar pengar í Føroyum. Eigarar eru Ítróttasamband Føroya, Føroya Ungdómsráð, Mentamálaráðið og Meginfelag teirra brekaðu í Føroyum.

Veddingarpengarnir verða býttir út eftir einum lykli, sum er reguleraður eftir løgtingslóg, og er hetta býtið 60 prosent til Ítróttasambandið, 20 prosent til Ungdómsráðið, 15 prosent til Mentamálaráðið og nú eisini fimm prosent til MBF, sum kom upp í skipanina í fjør og nú hevur fingið veddingarpengar fyri aðru ferð.

– Ja, vit fingu okkara fyrstu veddingarpengar í fjør, og teir eru komnir heilt ótrúliga væl við hjá bæði okkum og limafeløgunum, sigur Carita Björklund, forkvinna í Meginfelag teirra brekaðu í Føroyum, sum hesaferð fekk 525.000 krónur í sín part.

– Hesir pengarnir koma partvíst inn í raksturin og parvíst øllum limafeløgunum til góðar, tí ein partur fer í okkara limagrunn, sum okkara 24 limafeløg so kunnu søkja um at fáa pengar úr til serlig tiltøk ella átøk.

Í lagi at fleiri fáa

Tað var í síni tíð Ítróttasambandið, sum mestsum einsamalt syrgdi fyri, at samstarv kom í lag við donsku veddingartænastuna í 1998, men nú fleiri eru um at fáa ein part av samlaðu køkuni, er tað ikki nakað, Ítróttasambandið tekur sær tykni av.

– ÍSF hevur verið drívmegin frá fyrsta degi, men vit fáa so 60 prosent av pengunum, so tað er í fínasta lagi, at onnur eisini fáa, tí tað arbeiði, sum verður gjørt, er jú annað enn ítróttur. Tað, sum er mest umráðandi, er at hesir pengarnir gagna samfelagnum, sigur Petur Elias Petersen, ÍSF-forseti.

– Veddingarpengarnir hava so nógv at siga fyri okkum, tí uttan teir var neyvan nakað ÍSF í dag, sum vit kenna tað. Okkara partur er hesaferð 6,3 milliónir krónur, sum fara til ítøkiliga virksemið, vit hava í barna- og ungdómsarbeiðinum, meðan einki skal brúkast til umsiting, men sjálvt virksemið.

Einasta inntøkan

Hjá Føroya Ungdómsráð hava veddingarpengarnir eisini sera stóran týdning, tí nú ráðið hevur fingið at vita, at ein almenn játtan upp á 150.000 krónur verður skerd, hava tær 2,1 milliónir krónurnar frá veddingarpengunum alt at siga.

– Hjá nógv teimum flestu feløgunum, sum eru limir hjá okkum, er hetta tann einasta inntøkan, so hetta heldur lív í nógvum av tí sjálvbodna ungdómsarbeiðinum, sum er í Føroyum, sigur Rói B. Poulsen, formaður í stýrinum fyri Føroya Ungdómsráð, sum fevnir um stórt sæð allar ikki ítróttarligar ungdómsfelagsskapir í landinum, og sum letur 10 prosent av veddingarpengunum í ein stuðulsgrunn, sum tey 26 limafeløgini kunnu søkja úr.

Mentamálaráðið fær hesaferð næstan 1,6 millión krónur av veddingarpengunum, og verða hesir pengar latnir útaftur í stuðli til bæði feløg og einstaklingar.

– Í reglugerðini fyri stuðulin stendur, at ætlanin við hesi játtan er at stuðla verkætlanum og tiltøkum til gagns fyri børn og ung. Talan er um sera ymisk endamál, so stuðulin røkkur rættiliga vítt og kemur væl við nógvastaðni, sigur Alda Joensen, fulltrúi í Mentamálaráðnum.

Á myndunum er tað nevndarformaðurin í smápartafelagnum Ítróttavedding, Tórfinn Højgaard, ið handar kekkarnar við veddingarpengunum, sum hesaferð vóru tilsamans góðar 10,5 milliónir krónur.

Røsku kvinnurnar, sum eru við granskingarverkætlanini “Svim ella spæl teg til betri heilsu” leggja nógv fyri . Fyri seks vikum síðan løgdu 80 kvinnur til brots og trúliga hevur verið møtt. Tað er ÍSF, sum samskipar forvitnisligu verkætlanina, ið vísindaliga kannar heilsustøðuna hjá føroyskum kvinnur millum 35 og 50 ár.

- Hetta er ein rættiliga víðfevnd heilsukanning.  Áðrenn kvinnurnar fóru ígongd, gjørdu vit umfatandi undankanningar við m.ø. hjarta- og heilkropsskanningum og vødda- og blóðroyndum í tveir mánaðir, og nú eru vit miðskeiðis í venjingunum. Endamálið við granskingarætlanini er at skilja, hvussu ymiskar fysiologiskar skipanir respondera upp á ymisk sløg av venjing. Hetta verður gjørt  við tí fyri eyga at fáa nærri at vita, hvat tað er, sum regulerar teimum tillagingum, ið kropslig venjing stimbrar, sigur Magni Mohr, granskingarleiðari.

Á heimasíðuni hjá ÍSF ber til at fylgja við, hvussu kvinnurnar klára seg. Á einari sonevndari bloggu skrivar Bjørg á Rógvi á lættan og skemtiligan hátt javnan um, hvussu fótbóltsvenjingin gongur.

Tað gongur nógv betri at raka bóltin nú, og sjálvsálitið kvinkast tann rætta vegin fyri hvørja venjing. Men í dag fekk tað tó eitt lítið “dykk”.  Nakrir ungir jassar spældu á vøllinum tá vit komu,  men máttu sjálvandi fara tí FÓTBÓLTSLIÐIÐ skuldi á banan. Teir steðgaðu tó á úti við síðulinjuna, helst fyri at vita hvat vit vildu har. Tá so venjarin setti dystin í gongd, stóðu hasir kúllarnir í skellilátri, tann eini ringdi seg saman, fall til knýggja og helt um búkin, skrivar Bjørg á Rógvi millum annað í sínum bloggi.

Í granskingarverkætlanini verður hugt nærri at , hvussu tvey sløg av regluligari motiónssvimjivenjing og fótbóltsspæl ávirka millum annað hjartafunktion, vødda-, feitt og beinvevna hjá kvinnum, ið ikki venja regluliga.

- Sjálv venjingin stendur til at enda seinast í juni. Vit kanna í løtuni møguleikan fyri at leingja heilsukanningarnar. Nærum allar kvinnurnar er sinnaðar at halda fram, so vit vóna at fáa stuðul og fíggjarligan styrk til at halda fram við venjingunum restina av árinum og kanska inn i fyrsta part av 2014, sigur Magni Mohr

Við árslok er ætlanin at almannakunngera fyrstu úrslitini.

Eini 100 føroysk ítróttafólk umframt leiðarar, venjarar og miðlar leggja longu leiðina yvirum hav umborð á airbussinum hjá Atlantic Airways. Samlaða flogtíðin er 9 tímar við millumlending í St. Johns í Newfoundlandi.

Føroysku ítróttafólkini fara at kappast í badminton, beach volley, borðtennis, fimleiki, flogbólti, fjallasúkkling, frælsum ítróttí, golf, skjóting, súkkling, tennis og triathlon.

Føroyar hava bjóðað seg til at fyriskipa leikunum í 2019, og tí hava ÍSF og landsins myndugleikar mett tað hava stóran týdning, at vit vísa áhuga komandi leikirnar – eisini tá leikirnir eru á fjarskotnum støðum sum Bermuda.

Føroyar tóku í síni tíð undir við, at Bermuda fekk limaskap í Altjóða Oyggjaleikafelagsskapinum, og tí hevur ÍSF mett tað sum rætt, at Bermuda eisini fær møguleikan at fyriskipa leikunum.

Vegna búskaparkreppuna kring heimin seinnu árini og stóru fjarstøðuna til Bermuda, hava nógvar av limaoyggjunum valt at senda ein smærri hóp enn vanligt til oyggjaleikirnar í summar.

Føroyski hópurin, sum er á leið eins stórur sum vanligt, er tann triðstørsti á leikunum, og hava fyrireikararnir á Bermuda fleiri ferðir takka Føroyum fyri samhaldsfesti, sum Føroyar hava víst teimum við stóru føroysku luttøkuni.

At Føroyar kunnu vera so væl umboðaðar kemst av, at landið gav ein serligan stuðul til luttøkuna á júst hesum leikunum, og at Atlantic Airways vísti stóra vælvild við at samskipa flogferðina til Bermuda og heim aftur.

Ítróttagreinirnar, ið skulu senda fólk til Bermuda í summar, eru í løtuni í ferð við at velja sínar luttakarar út.

Spennandi verður at fylgja gongdini hesar seinasta mánaðirnar fram til leikirnar og ikki minni sjálvum leikunum, ið av álvara byrja sunnudagin 14. juli.

Ítróttasamband Føroya skipar árliga fyri vælumtóktu venjaraútbúgvingini fyri allar ítróttagreinir. Útbúgvingin er samansett av 4 pørtum. Fyrsti partur eitur ”Venjari 1” og er samansettur av tveimum skeiðum.

Í ár hevur eisini verið møguleiki at at fara eitt stig víðari til ”Venjari 2”. Hesin partur av útbúgvingini er í trimum pørtum og í vikuskiftinum var seinasti partur.

Venjari 2 er sett saman av eini røð av skeiðum um ymisk evnir. Tey skeið, ið eru partur av hesi útbúgving eru:

1. Aldursrelatera venjing
2. Fysisk venjing
3. Aerob venjing
4. Anaerob venjing
5. Venjara rollan
6. Styrkivenjing
7. Ítróttarskaðar
8. Ítróttar psykologi
9. Kostur
10. Teknikvenjing
11. Venjingarplanlegging

20 ítróttavenjarar frá 6 ymiskum ítróttagreinum luttóku og hava fingið prógv á venjara 2 – stigið.

Ítróttasamband Føroya ynskir tykkum øllum hjartaliga til lukku við útbúgvingini og vónar at nýggju førleikarnir og íblásturin fara at síggjast aftur úti í feløgunum til gagns fyri øll ítróttafólk.

Á myndini síggjast venjarirnir.
Aftast frá vinstru: Carl Oddmar Rasmussen – H71, Eilif Brimheim og Sofus Olsen – Smæran, Rókur í Jákupsstovu – Svimjisamband Føroya, Heri Ziska, Helgi Geyti, Hanus Bergsson – Hvirlan, Thomas Hansen – Ljósið, Heri S. Lamhauge – Støkk
Í miðjuni frá vinstru: Sólvá Poulsen – Klaksvíkar Badmintonfelag, Súsanna Krossteig Hansen – Kyndil, Hjørdis Hávarsá – Klaksvíkar Badmintonfelag, Malan Mikkelsen og Arnóra Thomsen – Ljósið, Lovisa Svabo – Hvirlan
Fremst frá vinstru: Trygvi Laksáfoss og Tummas Napoleon Arge  – Hvirlan, Harald Bjørgvin – Neistin/Kyndil, Kára Ólavsdóttir – Klaksvíkar Fimleikafelag.
Heri Johnsson – Team Klaksvík og Kristian Martin Joensen – HS, mangla á myndini

Starvsnevndin hjá Altjóða Oyggjaleikafelagsskapinum – International Island Games Association – IIGA – hevði sín árliga várfund í Føroyum hálvan mars 2013. Millum evnini, ið IIGA-starvsnevndin umrøddi, var ein framløga av eini ætlan fyri, hvussu Føroyar kundu hugsað sær at skipa fyri Oyggjaleikunum í 2019. Framløgan var samsvarandi nýggju mannagongdina fyri, hvussu rætturin at skipa fyri Oyggjaleikunum verður latin limaoyggjunum – hesa mannagongdina samtykti aðalfundurin hjá IIGA seinasta summar..

“Føroyar, ið eru ein av stovnandi limaoyggjunum í IIGA, skipaðu fyri einum sera væleydnaðum Oyggjaleikum í 1989. Vegna IIGA fegnist eg stórliga um, at Føroyar eru til reiðar at gerast vertur fyri leikunum aftur”, viðmerkti Jörgen Pettersson, formaður í IIGA.

Millum ætlaðu íløgurnar og dagføringarnar fram til 2019 løgdu Føroyar fram ætlanir um at gera ein 18-hols golfvøll, ið fer at hava frálíkt útsýni yvir sjógvin, í høvuðsstaðnum Tórshavn.

“Hendan íløgan fer at vera ein varandi arvur eftir leikirnar fyri allar Føroyar og teirra ferðavinnu”, segði Pettersson. IIGA-nevndin hitti politiskar myndugleikar umboðandi Føroya Landsstýri og Tórshavnar Kommunu, og lýstu hesir sín fulla stuðul til ætlanina um at fyriskipa leikunum aftur.

Frágreiðingar um gongdina í fyrireikingunum av NatWest Oyggjaleikunum á Jersey í 2015 og leikunum í Gotlandi í 2017 vórðu eisini lagdar fyri nevndina.

Høvuðsdenturin á fundinum varð tó lagdur á fyrireikingarnar av NatWest Oyggjaleikunum á Bermuda í summar (13.-19. juli). Eini 2.000 ítróttafólk, leiðarar og dómarar fara at taka lut í leikunum, ið fyri fyrstu ferð verða fyriskipaðir hinumegin Atlantshavið.

“Vit eru til reiðar til eina viku við ítrótti, og fara at vísa okkara gestum vakurleikan á Bermuda og okkara stóra alsk til ítrótt”, viðmerkti Paul Scope, ið umboðar vertsoynna í IIGA-nevndini.

Umboðið hjá høvuðsstuðlinum, NatWest, Jerry Whitsey, gleðir seg eisini til leikirnar á Bermuda. “Ein av orsøkunum hjá NatWest-bankanum at vera høvuðsstuðul hjá NatWest Oyggjaleikunum er vitanin um, at hesin felagsskapurin veruliga ger mun í oyggjasamfeløgunum, sum eru við. Arvurin frá leikunum – bæði av fyriskipan og luttøku – er fjølbroyttur og fer í nógv ár framyvir at hjálpa við at menna ítrótt í limaoyggjunum. Vit føra oyggjar saman í ítrótti og sonnum vinalagi”.

“IIGA og NatWest Oyggjaleikirnir menna oyggjar og oyggjabúgvar innan ítrótt. Heilt síðani 1985 hava “vinarligu leikirnir” samansjóða oyggjar og oyggjabúgvar. Í summar fara vit fyri fyrstu ferð tvørtur um Atlantshavið, og fer tað at víðka okkara sjónarring enn meiri”, viðmerkti Jörgen Pettersson. 

Meiri kunning fæst frá IIGA-formanninum Jörgen Pettersson á tel. +358 457 3135 640.

Eldhugaður undangongumaður í ítrótti, politikki og annars innan alt tað, hann hevur fingist við og havt áhuga fyri – og tað er ikki so lítið millum ár og dag. Soleiðis kann í stuttum gevast ein lýsing av føðingardagsbarninum, Sverre Midjord, sum 2. apríl fylti 80 ár.

Sverre er eitt av hesum fólkunum, ið gera vart við seg, har tey eru, og sum seta sær varandi spor, tí viljin er sterkur, sum drívur verkið. Alt hetta nógva verður gjørt so inniliga og sannførandi, at ofta hevur tú ivast í, hvussu tað ber til hjá einum menniskja at vera so tætt knýtt at áhugamálum og arbeiði, ið altíð hevur til endamáls, at fjøldin og – ikki minst – uppvaksandi ættarliðið kann njóta gott av tí.

Talan er ikki um at gera vart við seg sjálvan ella at laða sær sjálvum varðar, men alt hetta nógva er og hevur verið merkt av einum einastandandi samfelagssinni, ið so ómetaliga nógv menniskju kunnu njóta gott av. At Sverre er tvøramaður av heilum huga, hevur eingin nakrantíð havt orsøk til at ivast í, og hevur hann vart býin og staðið við hond og fót alla sína tíð, bæði í orð og í tal.

Í ítrótti og politikki hevur Sverre Midjord havt óteljandi álitisstørv, ið hava kravt ikki so lítið av honum. Men gjøgnumgangandi hevur verið ein ótroyttiligur arbeiðsinnsatsur, ið alla hansara lívsleið hevur borið við sær, at úrslit hava ligið eftir, og mál eru rokkin. Sjálvt, tá onnur hava hildið, at nú hevur verið siktað ov høgt, hevur tað hepnast honum at stýra og skipa so væl fyri, at øll hava ásannað, at kósin var tann rætta og úrslitið hareftir.

Bæði í lokalpolitikki og landspolitikki hevur Sverre verið ein av teimum, ið hava notið stóra virðing millum manna – bæði hjá samdum og ósamdum. Og sum ágrýtin samfelagskjakari hevur hann ikki verið bangin fyri at sett orð á mangt av tí, vanliga fólkið hugsaði, men kanska ikki hevði møguleika fyri at bera fram upp á sama máta sum hann. Í nógvar mátar má sigast, at Sverre í sínum politiska yrki veruliga hevur verið ein fólksins maður.

Ikki minni hevur hann lagt nógv og gott eftir seg í sínum yndisítrivi, ið øll árini hevur verið ítróttin. Sjálvur hevur hann roynt seg í bæði hondbólti og fótbólti, men serliga er tað innan borðtennis, at hann sum virkin íðkari hevur gjørt vart við seg. Hann eigur sín stóra lut í, at hesi ítróttagrein hevur verið lív lagað í Føroyum, tí hann var við til at legði lunnar undir føroyskt borðtennis, og taldist millum tey virknu við battinum langt upp í árini.

Drúgvur og trúgvur hevur Sverre Midjord eisini verið, tá talan hevur verið um at arbeitt fyri alla føroyska ítrótt, tí í meira enn 40 ár sat hann í stjórnini í Ítróttasambandi Føroya, har hann eisini í meiri enn 25 ár sat sum varaforseti. Fyri trúgva og drúgva virkið sítt innan ÍSF hevur Sverre fingið øll tey heiðsursmerki, Ítróttasambandið gevur.

Í starvstíð síni í Ítróttasambandi Føroya hevur Sverre upplivað og verið partur av nógvum broytingum, og menningin innan ítróttina hevur verið sera stór, men avbjóðingar tó ongantíð størri enn so, at Sverre var altíð klárur. Altíð hevur hann verið til reiðar at tikið eitt tak, har brúk hevur verið fyri tí, og á serliga fyriskipanaðarliga økinum hevur hann innan landsítrótt víst sínar dygdir.

Vit báðir hava samstarvað leingi og væl í felags tíð okkara í Ítróttasambandinum, men eisini hava vit havt nógv saman og nógv til felags á øðrum økjum. Vinsælur er Sverre sum fáur, og tí er tað mær av sonnum ein gleði at kunna bera honum hesa føðingardagsheilsan.

Góði Sverre, hjartaliga tillukku og takk fyri gott vinarlag og trúfesti. Alt tað besta frameftir.

Heðin Mortensen

Hvat gert tú fyri at halda teg í form?
Ikki nakað serligt, og formurin er helst tilsvarandi, tíverri. Men eg royni at ganga eitt sindur, og so framføri og spæli eg nógvan tónleik, og tað krevur nokk eitt sindur meira enn man gevur sær far um. At framføra nakrar tímar eitt leygarkvøld, futtar nakað væl av orku av!

Ert tú limur í ítróttarfelag?

Ja, eg eri limur í EB/Streymi, men bara sum stuðul.

Íðkaði tú ítrótt sum barn?
Ja, eg spældi hondbólt og eitt sindur av badminton. Men má eisini viðganga at eg ongantíð havi havt tað sum eitur av bóltsinni. Plagi at siga, at eg gavst at spæla hondbólt, tí eg tók so synd í teimum, eg spældi saman við

So í mínum føri bleiv tað tónleikur, sum bleiv frítíðarítrivið.

Hvønn týdning hevur ítróttur og rørsla fyri teg og samfelagið?
Ítróttur og rørðsla hevur stóran týdning fyri samfelagið. Tey flestu vilja helst hugsa um tað heilsuliga í tí, men man skal ikki gloyma allar tær løtur ítróttur gevur, tá tú ert áskoðari.

Nógvir fótbóltsdystir og hondbóltsdystir er man farin heim aftur frá, við høgum pulsi og alsveittur av áskoðaraplássinum. Og so er tað eisini tað savnandi og stuttliga kring um ítróttin, og felagsskapurin.

Sí hennara blog her…